ಜಲ್ಮಾ ದಿವಸ್ (Birthday)

1. ಪ್ರಸ್ತಾವನ್

  ಮೊಗಾಚಾನೊ, ಆಜ್ ಆಮಿ(ನಾಂವ್)ಚೊ ಜಲ್ಮಾ ದಿವಸ್ ಸಂಭ್ರಮ್ತಾಂವ್. ಆಮ್ಕಾಂ ಸಂತೊಸಾಚೊ ದೀಸ್. ಹರೇಕ್ ಜಲ್ಮಾ ದೀವಸ್ ದೆವಾಚೊ ಅಪರಮಿತ್ ಮೋಗ್ ಆಮ್ಕಾಂ ಉಗ್ಡಾಪೊ ಕರ್ತಾ ಆನಿ ದೆವಾಕ್ ಧಿನ್ವಾಸುಂಕ್ ಸಂಧರ್ಭ್ ದಿತಾ. ದೆಕುನ್ ಉಪ್ಕಾರಿ ಕಾಳ್ಜಾನ್ ಆಜ್ ಆಮಿ(ನಾಂವ್) ಸಂಗಿಂ ಮೆಳ್ಯಾಂ ಆನಿ ದೆವಾಚಿಂ ವಿಂಚ್ನಾರ್ ಆಶೀರ್ವಾದಾಂ (ನಾಂವ್)ಚೆರ್ ಮಾಗ್ಯಾಂ.

 

2. ಗೀತ್: ಸದಾಂನಿತ್ ಸೊಮ್ಯಾ (ಸೊ. ಧಿ. U.7)

     ಹರ್ಸಿತಾಂವ್ ತುಕಾ (ಸೊ. ಧಿ. U.4)

     ಮ್ಹಾಕಾ ಸೊಮ್‍ಯಾ ಜಲ್ಮಾ ದಿಂಚ್ (ಸೊ. ಧಿ. U.4)

 

3.ಪ್ರಾರ್ಥನ್:

    ಸರ್ಗಿಂಚಾ ಬಾಪಾ, ಜಿವಾಚಾ ಆನಿ ಮೊಗಾಚಾ ದಾತಾರಾ, ಆಜ್ ಆಮಿ (ನಾಂವ್)ಚೊ ಜಲ್ಮಾ ದಿವಸ್ ಸಂಭ್ರಮ್ತಾನಾ ತುವೆಂ ತಾಕಾ ದಿಲ್ಲ್ಯಾ ವಿವಿಧ್ ದೆಣ್ಯಾಂ ಪಾಸತ್ ತುಕಾ ಅರ್ಗಾಂ ದಿತಾಂವ್ ಆನಿ ತಾಚಾ ಸಂತೊಸಾಂತ್ ವಾಂಟೆಲಿ ಜಾತಾಂವ್.ತುಜ್ಯಾ ಮೊಗಾಂತ್ ತಾಕಾಂ ಸದಾಂ ಸಾಂಬಾಳ್ ಆನಿ ತುಜಾ ಆಶೀರ್ವಾದಾನಿ ತಾಕಾ ಭರ್. ತೊ / ತೆಂ ಜಾಂವ್ದಿ ಆಮ್ಚ್ಯಾ ಕುಟ್ಮಾಚೊ ಅಲಂಕಾರ್. ಹೆಂ ಆಮಿ ಮಾಗ್ತಾಂವ್ ತುಜ್ಯಾ ಪುತಾ ಜೆಜುಚೆ ನಾಂವಿಂ. ಆಮೆನ್.

 

4.ದೆವಾಚೆಂ ಉತರ್ : ಲೂಕ್ 1:47-55

             ಲೂಕ್ 2:8-20

             ಎಫೆಜ್ 1:3-10

             1ಥೆಸ್ಸಾ 5:16-18

             2ಥೆಸ್ಸಾ 1:3-5

5.ನಿಯಾಳ್:

    ಮನ್ಶಾಚೆಂ ಜೀವನ್ ದೆವಾಚೆಂ ಏಕ್ ದೆಣೆಂ. ಭಾಂಗಾರ್ ಆನಿ ವಜ್ರಾಂ ಪ್ರಾಸ್ ತೆಂ ಮೊಲಾದಿಕ್. ದೇವ್ ಹ್ಯಾ ಮೊಲಾದಿಕ್ ದೆಣ್ಯಾಚೊ ಧನಿ. ದೆವಾನ್ ರಚಲ್ಲ್ಯಾ ಸರ್ವ್ ಜಿವಿಂ ಪ್ರಾಸ್ ಮನಿಸ್ ಊಂಚ್, ಕಿತ್ಯಾಕ್ ತಾಣೆಂ ತಾಕಾ ತಾಚಾ ಸಾಕ್ರ್ಯಾಚೊ ಆನಿ ರುಪಾಚೊ ಜಾವ್ನ್ ರಚ್ಲಾ ಆನಿ ಸರ್ವ್ ರಚ್ಣೆಂಚೆರ್ ರಾಜ್ವಟ್ಕಿ ಚಲುಂಕ್ ಅಧಿಕಾರ್ ದಿಲಾ. ಪೂಣ್ ಆಪ್ಲ್ಯಾ ಅವಿಧೇಯ್‍ಪಣಾ ವರ್ವಿಂ ಮನ್ಶಾನ್ ದೆವಾಚಿ ಇಷ್ಟಾಗತ್ ಹೊಗ್ಡಾಯಲ್ಲ್ಯಾ ವೆಳಿಂ, ದೆವಾ ಬಾಪಾನ್ ಆಪ್ಲ್ಯಾ ಪುತಾ ಜೆಜುಕ್ ಹ್ಯಾ ಸಂಸಾರಿಂ ದಾಡ್ಲೊ ಆನಿ ತಾಚ್ಯಾ ಮೊರ್ನಾ ಜಿವಂತ್ಪಣಾ ವರ್ವಿಂ ಸಗ್ಳ್ಯಾ ಮನ್ಶಾಕುಳಾಕ್ ನವೆಂ ಜಿವಿತ್ ದಿಲೆಂ.

   ಪವಿತ್ರ್ ಸ್ನಾನಾಚ್ಯಾ ಸಂಸ್ಕಾರಾ ದ್ವಾರಿಂ ಆಮಿ ಹ್ಯಾ ನವ್ಯಾ ಜಿವಿತಾಂತ್ ಭಾಗಿದಾರ್ ಜಾತಾಂವ್ ಆನಿ ಜಿವಿತಾಚಾ ರಾಜ್ಯಾ ದಿಶೆನ್ ಭರ್ವಶ್ಯಾನ್ ಚಮ್ಕತಾಂವ್. ದೆಕುನ್ ದೈವಿಕ್ ಜಿವಿತಾಂತ್ ವಾಂಟೆಲಿ ಜಾಲ್ಲ್ಯಾಚೆಂ ಜಿವಿತ್, ವತ್ರ್ಯಾ ಮಹತ್ವಾಚೆಂ ಆನಿ ಜವಾಬ್ದಾರಿಚೆಂ.

   ಹರೇಕ್ ಜಲ್ಮಾ ದಿವಸ್ ಸಂತೊಸಾಚಿ ಬರಿ ಖಬರ್ ಪರ್ಗಟ್ತಾ ಆನಿ ದೇವ್ ಮನ್ಶಾಂಚೊ ಮೋಗ್ ಕರುನ್ ನಿರಾಶಿಂ ಜಾಂವ್ಕ್ ನಾ ಮ್ಹಳ್ಳೆಂ ಉಗ್ಡಾಪೆಂ ಕರ್ತಾ. ಜಲ್ಮಾ ದೀಸ್ ದೆವಾಕ್ ಮಹಿಮಾ ಗಾಂವ್ಕ್ ಏಕ್ ಆವ್ಕಾಸ್. ಜಿವಿತಾಚಿ ಹರೇಕ್ ಘಡಿ ಸೊಮ್ಯಾಕ್ ಆಮಿ ವಾಖಾಣುಂಕ್ ಜಾಯ್ ಆನಿ ತಾಚೊ ಅಪರಿಮಿತ್ ಮೋಗ್ ನಿಯಾಳುಂಕ್ ಜಾಯ್. ತರಿ ಜಲ್ಮಾ ದೀಸ್ ಏಕ್ ವಿಶೇಸ್ ಸಂಧರ್ಭ್ ದೆವಾಕ್ ಧಿನ್ವಾಸುಂಕ್ ಆನಿ ಜಿಣ್ಯೆ ದೆಣ್ಯಾ ಪಾಸತ್ ತಾಕಾ ಅರ್ಗಾಂ ದಿಂವ್ಕ್. ದೆವಾನ್ ದಿಲ್ಲೆಂ ಜಿವಾಚೆಂ ದೆಣೆಂ ದೆವಾಚಾ ಮೊಗಾಂತ್ ಆನಿ ಪೆಲ್ಯಾಚೆ ಸೆವೆಂತ್ ಫಳಾಭರಿತ್ ಕರ್ಚೆಂ ದೆವಾಕ್ ಧಿನ್ವಾಸ್ಚೆಂ ಜೊಕ್ತೆಂ ವಿಧಾನ್. ಮನ್ಶಾನ್ ಆಪ್ಲೊ ಜೀವ್  ಹೊಗ್ಡಾವ್ನ್ ಸಗ್ಳೊ ಸಂಸಾರ್ ಜೊಡ್ಲ್ಯಾರ್ ಕಿತೆಂ ಫಾಯ್ದೊ? ಸ್ವಾರ್ಥಿ ಆನಿ ಬೆಜವಾಬ್ದಾರೆಚಿ ಶೆಂಬರ್ ವರ್ಸಾಂಚಿ ಜಿಣಿ ಜಿಯೆಲ್ಯಾರ್ ಕಿತೆಂ  ಲಾಭ್? ದೆಕುನ್ ಕಿತ್ಲಿಂ ವರ್ಸಾಂ ಜಿಯೆಂವ್ಚೆಂ ಮ್ಹಣ್ ಲೇಕ್ ಘಾಲ್ಚ್ಯಾಕೀ ವರ್ಸಾ ಕಶಿಂ ಜಿಯೆಂವ್ಚಿಂ ಮ್ಹಣ್ ಚಿಂತ್ಲೆಂ ಬೋವ್ ಬರೆಂ. ಜೀವನ್ ಮ್ಹಳ್ಯಾರ್ ಕೇವಲ್ ಜಿಣ್ಯೆಕ್ ವರ್ಸಾಂ ಕುಡ್ಸುಂಚಿಂ ನ್ಹಯ್, ಬಗರ್ ಜಿವಾಚ್ಯಾ ಹರ್ ಏಕ್ ದಿಸಾಕ್ ನವೊ ಜೀವ್ ದಿಂವ್ಚೊ.  

 

6.ಪ್ರಾರ್ಥನಾಂ:

 

ಪ್ರೇರಕ್ : ಮೊಗಾಚಾನೊ, ದೇವ್ ಜಿವಾಚೊ ಆನಿ ಮೊಗಾಚೊ ಉಗಮ್. ಸರ್ವ್ ಜೀವ್ ತಾಚೆ ಥಾವ್ನ್ ಯೆತಾ ಆನಿ ತಾಚೆ ಥಂಯ್ ಸಂಪೂರ್ಣ್‍ಕಾಯೆಕ್ ಪಾವ್ತಾ. ತರ್ ಜಿವಿತಾಚಾ ದಾತಾರಾ ಲಾಗಿಂ ಆಮ್ಚಿಂ ಪ್ರಾರ್ಥನಾಂ ಆಮಿ ಉಬಾರುಂಯಾಂ ಆನಿ ಆಮ್ಚಿ ಜಿಣಿ ಅರ್ಥಾಭರಿತ್ ಕರುಂಕ್ ತಾಚೊ ಆಧಾರ್ ಮಾಗ್ಯಾಂ.

 

 1.ಸರ್ಗಿಂಚಾ ಬಾಪಾ, ಪವಿತ್ರ್ ಸಭೆಚಾ ವ್ಹಡಿಲಾನಿಂ ಮನ್ಶಾಂಚ್ಯಾ ಜಿವಾಚಿಂ ಮೋಲ್ ಆನಿ ಮಹತ್ವ್ ಉಕಲ್ನ್ ಧರ್ನ್ ಮನ್ಶಾ ಜಿವಾ ವಿರೋಧ್ ವೆಚಿಂ ಸರ್ವ್ ಪ್ರೇತನಾಂ ಖಂಡನ್ ಕರುಂಕ್ ತಾಂಕಾ ಧಯ್ರ್ ದಿ ಮ್ಹಣ್ ಮಾಗ್ತಾಂವ್.

 

ಜಿವಿತಾಚಾ ದಾತಾರಾ, ಆಮ್ಚೆಂ ಪ್ರಾರ್ಥನ್ ಆಯ್ಕ್.

 

 2.ಸರ್ಗಿಂಚಾ ಬಾಪಾ, ಆಜ್ ಜಲ್ಮಾ ದಿವಸ್ ಸಂಭ್ರಮ್ಚ್ಯಾ (ನಾಂವ್)ಚೆರ್ ತುಜಿಂ ಧಾರಾಳ್ ಆಶೀರ್ವಾದಾಂ ಘಾಲ್. ಬರಿ ಬಲಾಯ್ಕಿ, ಮತಿಕ್ ಸಮಾಧಾನ್ ಆನಿ ಆನಿ ಜಿಣ್ಯೆ ಸಂತೊಸ್ ತಾಕಾ ದಿವ್ನ್ ತಾಚಿ ಜಿಣಿ ಸುಫಳ್ ಕರ್ ಮ್ಹಣ್ ಮಾಗ್ತಾಂವ್.

 

ಜಿವಿತಾಚಾ ದಾತಾರಾ, ಆಮ್ಚೆಂ ಪ್ರಾರ್ಥನ್ ಆಯ್ಕ್.

 

 3.ಸರ್ಗಿಂಚಾ ಬಾಪಾ, (ನಾಂವ್)ಚ್ಯಾ ಕುಟ್ಮಾಚೆರ್ ತುಜಿ ಕಾಕುಳ್ತಿಚಿ ದಿಷ್ಟ್ ಘಾಲ್. ಮಾಯಾಮೊಗಾಚೆಂ, ಎಕ್ವೊಟಾಚೆಂ ಆನಿ ಸಮಾಧಾನಾಚೆಂ ಆದರ್ಶ್ ಕುಟಾಮ್ ಬಾಂಧುಂಕ್ ತಾಂಕಾಂ ತುಜೊ ಆಧಾರ್ ದಿ ಮ್ಹಣ್ ಮಾಗ್ತಾಂವ್.

 

ಜಿವಿತಾಚಾ ದಾತಾರಾ, ಆಮ್ಚೆಂ ಪ್ರಾರ್ಥನ್ ಆಯ್ಕ್.

 

 4.ಸರ್ಗಿಂಚಾ ಬಾಪಾ, ತುವೆಂ ದಿಲ್ಲ್ಯಾ ಜಿವಾಚಿ ನಿರ್ಲಕ್ಷಾ ಕರಿನಾಶೆಂ, ಬಗರ್ ಜೀವನ್ ತುಜೆಂ ವರ್ತೆಂ ದೆಣೆಂ ಮ್ಹಣ್ ಸಮ್ಜೊಂಕ್ ಆಮ್ಚ್ಯಾ ರಾಜಕೀಯ್ ಆನಿ ಸಮಾಜಿಕ್ ಮುಕೆಲ್ಯಾಂಚಿ ಮತ್ ಉಜ್ವಾಡಾಯ್ ಮ್ಹಣ್ ಮಾಗ್ತಾಂವ್.

 

ಜಿವಿತಾಚಾ ದಾತಾರಾ, ಆಮ್ಚೆಂ ಪ್ರಾರ್ಥನ್ ಆಯ್ಕ್.

 

5. ಸರ್ಗಿಂಚಾ ಬಾಪಾ, ವಿವಿಧ್ ವಾಯ್ಟ್ ಸವಯಾಂಕ್ ಬಲಿ ಜಾವ್ನ್ ಜೀವನ್ ಪಿಡ್ಡಾರ್ ಕರ್ಚ್ಯಾಂನಿ ತಾಂಚಾ ಆನಿ ಹೆರಾಂಚಾ ಜಿವಾಚೆಂ ಮೋಲ್ ಸಮ್ಜೊನ್ ಜವಾಬ್ದಾರೆಚೆ ವ್ಯಕ್ತಿ ಜಾಂವ್ಕ್ ತುಜೆ ಲಾಗಿಂ ಮಾಗ್ತಾಂವ್.

 

ಜಿವಿತಾಚಾ ದಾತಾರಾ, ಆಮ್ಚೆಂ ಪ್ರಾರ್ಥನ್ ಆಯ್ಕ್.

 

ಪ್ರೇರಕ್: ಸರ್ಗಿಂಚಾ ಬಾಪಾ, ಆಜ್ ಆಮ್ಚ್ಯಾ (ನಾಂವ್)ಚೊ ಜಲ್ಮಾ ದಿವಸ್ ಸಂಭ್ರಮ್ತಾನಾ ತುಕಾ ಆಮಿ ಧಿನ್ವಾಸ್ತಾಂವ್. ತಾಚೆರ್ ತುಜಿಂ ವಿಂಚ್ನಾರ್ ಆಶೀರ್ವಾದಾಂ ಘಾಲ್ ಆನಿ ತಾಕಾ ತುಜ್ಯಾ ಮೊಗಾಂತ್ ಸದಾಂ ಸಾಂಬಾಳ್. ತಶೆಂಚ್ ಪವಿತ್ರ್ ಸ್ನಾನಾಂತ್ ತುಜ್ಯಾ ಪುತಾ ಜೆಜುನ್ ಆಮ್ಕಾಂ ದಿಲ್ಲೆಂ ನವೆಂ ಜಿವಿತ್ ಆಮಿ ಜತ್ನಾಯೆನ್ ಸಾಂಬಾಳುಂಕ್ ಆನಿ ಏಕ್ ದೀಸ್ ತುಜೆಂ ಸಂಗಿಂ ಪವಿತ್ರ್ ಅತ್ಮ್ಯಾಚ್ಯಾ ಎಕ್ವಟಾಂತ್ ಸರ್ಗಿಂ ರಾಜಾಂತ್ ತುಕಾ ವಾಖಾಣುಂಕ್ ಆಮ್ಕಾ ಸಮೆಸ್ತಾಂಕ್ ತುಂ ಫಾವೊ ಕರ್. ಹೆಂ ಆಮಿ ಮಾಗ್ತಾಂವ್ ತುಜ್ಯಾ ಪುತಾ ಜೆಜುಚೆ ನಾಂವಿಂ. ಆಮೆನ್.

 

 7.ಜಲ್ಮಾ ದಿಸಾಕ್ ಉಲ್ಲಾಸುಂಚೆಂ ಗೀತ್ :

 

 8.ಜೆವ್ಣಾಂಚೆರ್ ಆಶೀರ್ವಾದ್ :

 

   ದೆವಾ ಆಮ್ಚ್ಯಾ ಬಾಪಾ, ತುಂ ಆಮ್ಚೊ, ತುಜ್ಯಾ ಭುರ್ಗಾಂಚೊ, ಮೋಗ್ ಕರ್ತಾಯ್ ಆನಿ ತುಜ್ಯಾ ದೈವಿಕ್ ಜಿವಿತಾಂತ್ ಆಮ್ಕಾಂ ವಾಂಟೆಲಿ ಕರ್ತಾಯ್. ಆಜ್ ಆಮಿ ತಯಾರ್ ಕೆಲ್ಯಾ ಹ್ಯಾ ಜಲ್ಮಾ ದಿಸಾಚಾ ಜೆವ್ಣಾಚೆರ್  ತುಜೊ ಆಶೀರ್ವಾದ್ ಘಾಲ್ ಆನಿ ತೆಂ ಜೆವಣ್ ಸೆವ್ಲೆಲಿಂ ಆಮಿ ಎಕಾ ಕಾಳ್ಜಾಚಿಂ ಆನಿ ಎಕಾ ಮನಾಚಿಂ ಜಾಂವ್ಕ್ ಆಮ್ಕಾಂ ತುಜಿ ಕುರ್ಪಾ ದಿ. ಕ್ರಿಸ್ತಾ ಆಮ್ಚ್ಯಾ ಸೊಮಿಯಾ ಮಾರಿಫತ್. ಆಮೆನ್.

                              ಮಾ| ರೊನಾಲ್ಡ್ ಸೆರಾವೊ

                                   ಮಂಗಳ ಜ್ಯೋತಿ