ಸ್ತ್ರೀಯಾಂಚೊ ದೀಸ್ (Women's Day)

ಸ್ತ್ರೀಯಾಂಚೊ ದೀಸ್

1. ಪ್ರಸ್ತಾವನ್:

ಮೊಗಾಚಾನೊ, ಅಂತರಾಷ್ಟ್ರೀಯ್ ಸ್ತ್ರೀಯಾಂಚೊ ದೀಸ್- ಸ್ತ್ರೀಯಾಂಚಾ ಹಕ್ಕಾಂ ಆನಿ ಗೌರವ ವಿಶಿಂ ವಿಶೇಸ್ ಥರಾನ್ ನಿಯಾಳ್ಚೊ ದೀಸ್. ದೆವಾನ್ ಮನ್ಶಾಕ್ ದಾದ್ಲೊ ಅನಿ ಸ್ತ್ರೀ ಜಾವ್ನ್ ತಾಚಾಚ್ ಸಾರ್ಕ್ಯಾ ಆನಿ ರುಪಾಚಿಂ ಜಾವ್ನ್ ರಚ್ಲಿಂ. ತರ್‌ಯಿ ಸಂಸಾರಾಚೆ ಸುರ್ವೆರ್ ಥಾವ್ ಸ್ತ್ರೀಯೊ ಸಮಾಜೆಚಾ ಶೋಶಣಾಕ್ ಬಲಿ ಜಾಲ್ಯೊ. ಅಂತರಾಷ್ಟ್ರೀಯ್ ಸ್ತ್ರೀಯಾಂಚೊ ದೀಸ್ ತಾಂಚಿಂ ಹಕ್ಕಾಂ ಜಾಣಾಜಾಂವ್ಕ್ ಆನಿ ಸಮಾಜಾಂತ್ ತಾಂಣಿಂ ಕ್ರಿಯಾತ್ಮಕ್ ರಿತಿನ್ ವಾಂಟೊ ಘೆಂವ್ಕ್ ಪ್ರೇರಣ್ ದಿತಾ. ದೆಕುನ್ ಶತಮಾನಾಂ ಥಾವ್ನ್ ಶೋಶಣಾಕ್ ಬಲಿ ಜಾಲ್ಲ್ಯಾ ಸ್ತ್ರೀಯಾಂ ವಿಶಿಂ ಚಿಂತಪ್ ಆಟವ್ನ್ ಆಯ್ಚ್ಯಾ ಸಮಾಜಾಂತ್ ಸ್ತ್ರೀಯಾಂಕ್ ದಾದ್ಲ್ಯಾ ಸಮಾಸಮ್ ಗೌರವ್ ಮೆಳೊಂಕ್ ಸಂಘಟಿತ್ ಜಾವ್ನ್ ವಾವ್ರುಂಕ್ ದೆವಾಚೊಆಧಾರ್ ಮಾಗ್ಯಾಂ.

2. ಗೀತ್:

ಜೈ ಜೈ ಜೈ ಮಾಯೆ ತುಕಾ ಜೈ, ಜೈ ಜೈ (ಸೊ. ಧಿ. 0. 48)

ನಮಾನ್ ಮರಿಯೆ (ಸೋ. ಧಿ. 0, 49)

ಅಚಲ್ ಹಾಂವ್ ಸರ್ವೆಸ್ಪರಾ (ಸೊ. ಧಿ. I. 10)

3. ಪ್ರಾರ್ಥನ್:

ಸರ್ಗಿಂಚಾ ಬಾಪಾ, ತುವೆಂ ಮನ್ಶಾಕ್ ದಾದ್ಲೊ ಆನಿ ಸ್ತ್ರೀ ಜಾವ್ನ್ ರಚ್ಲೆಲ್ಯಾಕ್ ತುಕಾ ಆಮಿ ಅರ್ಗಾಂ ದಿತಾಂವ್. ತುಜಾ ರಚನೆಚಾ ವಾವ್ರಾಂತ್ ಸ್ತ್ರೀಯೆಕ್ ತುವೆಂ ವಿಶೇಸ್ ವಾಂಟೊ ದಿಲಾಯ್ ಆನಿ ತಿಚೆ ಹಾತಿಂ ನವ್ಯಾ ಜಿವಾಚಿ ಜವಾಬ್ದಾರಿ ದಿಲ್ಯಾಯ್, ಆದರ್ಶ್ ಕುಟ್ಮಾಂ ರಚುಂಕ್ ಆಮ್ಕಾಂ ತುಜ್ಯಾ ಭುರ್ಗ್ಯಾಂಕ್ ತುಜೊ

ಆಧಾರ್ ದಿ. ತುಜ್ಯಾ ಮೊಗಾನ್ ಆಮ್ಕಾಂ ಸರ್ವ್ ಶೋಶಣಾ ಥಾವ್ನ್ ಮುಕ್ತ್ ಕರ್‌, ಕ್ರಿಸ್ತಾ ಆಮ್ಚ್ಯಾ ಸೊಮ್ಯಾ ಮಾರಿಫತ್, ಆಮೆನ್.

4. ದೆವಾಚೆಂ ಉತರ್:

ಮಾರ್ಕ್ 16:9-11

ಲೂಕ್ 2:36-38

ಲೂಕ್ 8:1-3

ಲೂಕ್ 10:38-42

ಜುವಾಂವ್ 20:11-18

ಧ.ಕೃ, 16:12-15

5. ನಿಯಾಳ್:

ಜೆಜು ಪುರುಷ್ ಪ್ರಧಾನ್ ಜುದೆವ್ ಧರ್ಮಾಂತ್ ಜಲ್ಮಲೊ ಆನಿ ಜಿಯೆಲೊ. ತರ್‌ಯಿ ಸ್ತ್ರೀಯಾಂ ಥಂಯ್ ತಾಕಾ ವಿಶೇಸ್ ಮೋಗ್ ಆನಿ ಹುಸ್ಕೊ ಆಸ್‌ಲ್ಲೊ. ತಾಚೆ ಪರ್ಗಟ್ ಜಿಣ್ಯೆಂತ್ ತಾಕಾ ಸಬಾರ್ ಸ್ತ್ರೀಯಾಂಚೊ ಸಾಂಗಾತ್ ಲಾಭ್ಲೊ. ಅನಿ ತಾಣೆಂ ದೆವಾಚೆಂ ರಾಜ್ ಪರ್ಗಟುಂಕ್ ತ್ಯೊ ಆಧಾರ್ ಜಾಲ್ಯೊ (ಲೂಕ್ 8,

2-3). ಬೆತನಿಚಿ ಮರಿ ಆನಿ ಮಾರ್ತಾ ತಾಚೊ ಅಪ್ತ್ ಮಿತ್ರಿಣ್ಯೊ. ತಾಂಚಾ ಘರಾ ಜೆಜು ತವಳ್ ತವಳ್ ಭೆಟ್ ದಿತಾಲೊ (ಲೂಕ್ 10, 38-42).

ಜೆಜು ಅನಿ ಸಾಮಾರಿಯಾಚೆ ಸ್ತ್ರೀಯೆ ಮಧೆಂ ಜಾಲ್ಲೊ ಸಂವಾದ್ ನಿಜಾಯ್ಕಿ ವಿಶಿಷ್ಟ್. ನೀಜ್ ದೆವಾಚಿ ಒಳಕ್ ನಾತ್‌ಲ್ಲಿ ಆನಿ ನಾಂವ್ ನಾಸ್‌ಲ್ಲಿ ಸಾಮಾರಿಯಾಚಿ ಸ್ತ್ರೀ, ಜೆಜುಚಾ ಉಲೊವ್ಣ್ಯಾಂತ್ ತೊ ಬಾಸಾಯ್ಲಲೊ ಸೊಡ್ವಣ್ಣಾರ್‌ ಮ್ಹಣ್

ಮಾನುನ್ ಘೆತಾ ಅನಿ ಅಪ್ಲ್ಯೆ ಹಳ್ಳೆಚಾ ಲೊಕಾಕ್ ಹೆಂ ಸತ್ ಪರ್ಗಟ್ತಾ. ಜೆಜುನ್ ತಿಕಾ ನವೊ ಭರ್ವಸೊ ದಿಲೊ ಆನಿ ತಿಣೆಂ ಜೆಜು ಥಾವ್ನ್ ತಿಚೆ ಜಿಣ್ಯೆಕ್ ನವೊ ಅರ್ಥ್ ಜೊಡ್ಲೊ. ತಿಚೆಂ ಉಗ್ತೆಂ ಮನ್ ಜೆಜುನ್ ತಿಚೆ ಥಂಯ್ ಅದ್ಭುತಾಂ

ಕರುಂಕ್ ಕಾರಣ್ ಜಾಲೆಂ. ಸಾಮಾರಿಯಾಚಿ ಸ್ತ್ರೀ, ಜೆಜು ಥಂಯ್ ಆಮ್ಕಾಂ ನವೆಂ ಜಿವಿತ್ ಮೆಳ್ತಾ ಮ್ಹಣ್ ಶಿಕಯ್ತಾ.

ಮರಿ ಮಾಗ್ದಲೆನ್ ಜೆಜುಕ್ ಭೆಟ್‌ಲ್ಲಿ ಆನಿ ಜೆಜು ಥಾವ್ನ್ ನವೆಂ ಜಿವಿತ್ ಜೊಡ್‌ಲ್ಲಿ ಏಕ್ ವಿಶೇಸ್ ಸ್ತ್ರೀ. ಜೆಜುನ್ ತಿಕಾ ಆಪ್ಲ್ಯಾ ಜಿವಂತ್ಪಣಾಚಿ ಪ್ರಥಮ್ ಸಾಕ್ಸ್ ಕೆಲಿ. ಎಕೆ ಸ್ತ್ರೀಯೆ ವರ್ವಿಂ ಪಾತಕ್ ಸಂಸಾರಿಂ ಆಯ್ಲೆಂ ತರ್, ಮರಿ ಮಾಗ್ದಲೆನಾ ಮುಕಾಂತ್ರ್ ಜಿವಂತ್ ಜೆಜು ಪಾತ್ಕಾಂ ಆನಿ ಮೊರ್ನಾಚೆರ್ ಜಯ್ತೆವಂತ್ ಜಾಲಾ ಮ್ಹಳ್ಳೆಂ ಸತ್ ಪರ್ಗಟ್ ಜಾಲೆಂ.

ಮರಿ, ಜೆಜುಚಿ ಆವಯ್, ಸರ್ವ್ ಸ್ತ್ರೀಯಾಂಕ್ ಆದರ್ಶ್. ತಿಚಿ ಜಿಣಿ ಸಾದಿ ಅನಿ ಗುಪಿತ್ ತರ್‌ಯಿ ತಿಚೆ ಖಾಲ್ತೆಪಣಾ ಅನಿ ಭಾವಾರ್ಥಾನ್ ಸರ್ವ್ ಸ್ತ್ರೀಯಾಂ ಭಿತರ್ ತಿ ಸದೆಂವ್. ಏಕ್ ಆವಯ್ ಆನಿ ಪತಿಣ್ ಜಾವ್ನ್ ಸರ್ವ್ ಸ್ತ್ರೀಯಾಂಕ್ ತಿ ಮೇಲ್‌ಫಾಂಕ್ತ್, ದೆವಾನ್ ಮರಿಯೆಕ್ ಫಾವೊ ಕೆಲ್ಯಾ ಹ್ಯಾ ವಿಶೇಸ್ ಗೌರವ ಪಾಸತ್ ಸರ್ವ್ ಸ್ತ್ರೀಯಾಂನಿ ಸಂತೊಸ್ ಪಾಂವೊಂಕ್ ಜಾಯ್ ಆನಿ ದೆವಾಕ್

ಅರ್ಗಾಂ ದಿಂವ್ಕ್ ಜಾಯ್. ತಶೆಂಚ್ ಮರಿಯೆ ಪರಿ ತಾಂಚೆಂ ಜೀವನ್ ಸೊಭಂವ್ಕ್ ದೆವಾಚೊ ಆಧಾರ್ ಆನಿ ಮರಿಯೆಚಿ ಮಜತ್ ಮಾಗೊಂಕ್ ಜಾಯ್.

ಚರಿತ್ರೆಚಾ ಸನ್ನಿವೇಶಾಂ ವರ್ವಿಂ ಶತಮಾನಾಂ ಥಾವ್ನ್ ಆಮ್ಚ್ಯಾ ಸಮಾಜಾಂತ್ ಸ್ತ್ರೀಯಾಂಚೆಂ ಶೋಶಣ್ ಜಾಲಾಂ. ಕಿತ್ಲೊಶ್ಯೊ ಸ್ತ್ರೀಯೊ ಆಮ್ಚ್ಯಾ ಗಾಂವಾಂತ್ ಕಶ್ಚತಾತ್. ಜಾಯ್ತ್ಯೊ ಸ್ತ್ರೀಯೋ ದೊತಿಚಾ ದೆಂವ್ಚಾರಾಕ್ ಬಲಿ ಜಾಲ್ಯಾತ್ ಆನಿ

ನಿರಾಶಿ ಜಾವ್ನ್ ಮೆಲ್ಯಾತ್. ಕಿತ್ಲೊಶ್ಯೊ ಸ್ತ್ರೀಯೊ ಲೈಂಗಿಕ್ ಶೋಷಣಾಕ್ ಒಳಗ್ ಜಾಲ್ಯಾತ್ ಆನಿ ವಾಟ್ ನಾಸ್ತಾನಾ ವಳ್ವಳ್ತಾತ್. ಸಬಾರ್ ಸ್ತ್ರೀಯೋ ಶಿಕಾಪ್ ನಾಸ್ತಾಂ ದುಸ್ರ್ಯಾ ವರ್ಗಾಚ್ಯೊ ಮ್ಹಳ್ಳ್ಯಾ ಚಿಂತ್ಪಾನ್ ಖರ್ಗತಾತ್. ಝಜಾಂ ವರ್ವಿಂ ನಿರಾಪ್ರಾದಿ ಅವಯೊ, ಪತಿಣ್ ಆನಿ ಭಯ್ಣಿಂ ಸಂಹಾರ್ ಜಾಲ್ಯಾತ್ ಆನಿ ಹಾಚೆ

ವರ್ವಿಂ ಕುಟ್ಮಾ ದೆಸ್ವಾಟ್ ಜಾಲ್ಯಾಂತ್. ಜಾಹಿರಾತಾಂತ್‌ಯಿ ಸ್ತ್ರೀಯೊ ವಿಕ್ರಾಪಾಚ್ಯೊ ವಸ್ತು ಜಾಲ್ಯಾತ್ ಆನಿ ತಾಂಚಾ ಸ್ತ್ರೀಪಣಾಚೊ ಮಾನ್ ಆನಿ ಗೌರವ್ ಹೊಗ್ಡಾಂವ್ಕ್ ಪಾವ್ಲ್ಯಾಂತ್.

ರಚ್ನಾರಾನ್ ದಾದ್ಲ್ಯಾ ಸಂಗಿಂ ಸ್ತ್ರೀಯೆಕ್‌ಯಿ ಸಮಾ ಸಾರ್ಕೊ ಮಾನ್ ಆನಿ ಗೌರವ್ ದಿಲಾ. ತರ್‌ಯಿ ಸಮಾಜಾನ್ ತೊ ಚೊರ್ಲಾ. ರಚ್ನಾರಾನ್ ಸ್ತ್ರೀಯಾಂಕ್ ದಿಲ್ಲೊ ಮಾನ್ ಆನಿ ಗೌರವ್ ನವ್ಯಾನ್ ಮೆಳೊಂಕ್ ಸ್ತ್ರೀಯಾಂನಿಚ್ ಝಜೊಂಕ್ ಆಸಾ. ಅರ್ವಿಲ್ಯಾ ವರ್ಸಾನಿ ಹೈ ದಿಶೆನ್ ಜಾಯ್ತೆಂ ಚಿಂತಪ್ ಉದೆಲಾಂ ಅನಿ

ಸ್ತ್ರೀಯಾಂ ಥಂಯ್ ಸಮಾಜಾಚೊ ಮನೋಭಾವ್ ಬದ್ಲೊಂಕ್ ಪ್ರಾರಂಭ್ ಜಾಲಾ. ಸ್ತ್ರೀ ಆಸ್ತ್ ಯಿ ನ್ಹಯ್, ವಸ್ತ್ ಯಿ ನ್ಹಯ್, ಬಗರ್ ದೆವಾನ್ ವಿಂಚ್ಲೆಲಿ ಮನ್ಶಾಕುಳಾಕ್ ಜೀವ್ ದಿಂವ್ಚಿ ಆವಯ್, ಮೋಗ್ ಆನಿ ವಿಶ್ವಾಸ್ಪಣ್ ದಿಂವ್ಚಿ ಪತಿಣ್ ಆನಿ ಗರ್ಜಾ ಆಕಾಂತಾಂತ್ ಪಾಂವ್ಚಿ ಭಯ್ಣ್ ಮ್ಹಳ್ಳೆಂ ಚಿಂತಪ್ ರೂಪಿತ್ ಜಾಂವ್ಕ್ ಸ್ತ್ರೀಯಾಂನಿ ಸಂಗಟಿತ್ ಜಾವ್ನ್ ವಾವ್ರ್ ಕರುಂಕ್ ಆಯ್ಚೊ ಹೊ ಸ್ತ್ರೀಯಾಂಚೊ ದೀಸ್ ಆಮ್ಕಾಂ ಪ್ರೇರಣ್ ಜಾಂವ್.

6. ಪ್ರಾರ್ಥನಾಂ:

ಪ್ರೇರಕ್: ಮೊಗಾಳ್ ಭಯ್ಣಿಂನೊ ಆನಿ ಭಾವಾಂನೊ, ದೇವ್ ದಾದ್ಲ್ಯಾ ತಶೆಂ ಸ್ತ್ರೀಯಾಂಕ್ ಎಕಾಮೆಕಾಚಾ ಸಹಕಾರಾನ್ ನವೊ ಸಂಸಾರ್ ರೂಪಿತ್ ಕರುಂಕ್ ಆಪಯ್ತಾ. ತರ್, ಆಮಿ ದೆವಾ ಲಾಗಿಂ ಆಮ್ಚಿಂ ಪ್ರಾರ್ಥನಾಂ ಉಬಾರುಂಯಾ.

1. ಮೊಗಾಳಾ ಬಾಪಾ, ಪವಿತ್ ಸಭೆಚಾ ಮುಕೆಲ್ಯಾಂನಿ ಪವಿತ್ರ್ ಸಭೆಚಾ ಕುಟ್ಮಾಂತ್ ಸ್ತ್ರೀಯಾಂಕ್ ಫಾವೊತೊ ಪಾತ್ರ್ ಘೆಂವ್ಕ್ ಆವ್ಕಾಸ್ ದೀಶೆಂ ಅನಿ ತಾಂಕಾಂ ಅಯ್ಕೊನ್ ಜೆಜುಚಿ ಬರಿ ಖಬರ್ ಗಾಜಂವ್ಕ್ ಯೋಜನ್ ರೂಪಿತ್ ಕರಿಶೆಂ ತುಜೆ ಲಾಗಿಂ ಮಾಗ್ತಾಂವ್.