ಭುರ್ಗ್ಯಾಂಚೊ ದೀಸ್ (Children's day)

ಭುರ್ಗ್ಯಾಂಚೊ ದೀಸ್

1. ಪ್ರಸ್ತಾವನ್ :

ಮೊಗಾಚಾಂನೊ, ಆಜ್ ಆಮಿ "ಭುರ್ಗ್ಯಾಂಚೊ ದೀಸ್" ಸಂಭ್ರಮ್ತಾಂವ್.

ಭುರ್ಗಿಂ ಆಮ್ಚ್ಯಾ ಕುಟ್ಮಾಚಿ ಸೊಭಾಯ್, ಸಮಾಜಾಚೆಂ ಭವಿಶ್ಯ್ ಆನಿ ಪವಿತ್ರ್

ಸಭೆಚೊ ಅಲಂಕಾರ್, ಜೆಜು, ದೆವಾಚೊ ಪೂತ್, ಭುರ್ಗೊ ಜಾವ್ನ್ ಆಮ್ಚೆ ಮಧೆಂ

ಆಯ್ಲೊ. ತಾಚೆ ಪರ್ಗಟ್ ಜಿಣಿಯೆ ವೆಳಿಂ ತಾಣೆಂ ಭುರ್ಗ್ಯಾಂಚೊ ಮೋಗ್ ಕೆಲೊ

ಆನಿ ಸರ್ಗಿಂಚೆಂ ರಾಜ್ ತಾಂಚೆಂ ಮ್ಹಣ್ ಪರ್ಗಟ್ಲೆಂ. ಆಜ್ ಭುರ್ಗ್ಯಾಂ ಸಂಗಿಂ ಆಮಿ

ಸಂತೊಸ್ ಪಾವ್ಯಾಂ ಆನಿ ತಾಂಣಿಂ ಕುಡಿನ್, ಜಾಣ್ವಾಯೆನ್ ಆನಿ ದೇವ್‌ಭಿರಾಂತಿನ್

ವಾಡೊಂಕ್ ದೆವಾಚೊ ಆಧಾರ್ ಮಾಗ್ಯಾಂ.

2.ಗೀತ್

ಗಾವ್ಯಾಂ ನವೆಂ ಗೀತ್ (ಸೊ. ಧಿ, A. 22)

ನವೆಂ ಗಾಯನ್ ಸರ್ವೆಸ್ಪರಾಕ್ (ಸೊ. ಧಿ, U. 14)

ವಿಯೋಲ್ ವಿಣ್ಯಾಂಚೆರ್ (ಸೊ. ಧಿ, U. 19)

3. ಪ್ರಾರ್ಥನ್:

ಸರ್ಗಿಂಚಾ ಬಾಪಾ, ಮೊಗಾಚಾ ಸಾಗೊರಾ, ತುವೆಂ ತುಜಾ ಪುತಾ ಜೆಜುಂ

ಥಂಯ್ ಆಮ್ಕಾಂ ತುಜಿಂ ಭುರ್ಗಿಂ ಕೆಲ್ಯಾಂಯ್ ಆನಿ ಆಮ್ಕಾಂ ತುಜೆ ಕುರ್ಪೆ

ದೆಣ್ಯಾಂನಿ ನೆಟಯ್ಲಾಂಯ್, ಆಜ್ ಆಮಿ ಭುರ್ಗ್ಯಾಂಚೊ ದೀಸ್ ಸಂಭ್ರಮ್ತಾನಾ

ಸರ್ವ್ ಭುರ್ಗ್ಯಾಂಚೆರ್ ತುಜೊ ಆಶೀರ್ವಾದಾಂಚೊ ಶಿವರ್‌ ವೋತ್ ಮ್ಹಣ್

ಮಾಗ್ತಾಂವ್, ತುಜ್ಯಾ ಪುತಾ ಜೆಜುಚಿ ದೇಕ್ ಫೆವ್ನ್ ಕುಡಿನ್, ಜಾಣ್ವಾಯೆನ್ ಆನಿ

ಕುರ್ಪೆನ್ ತಾಂಣಿಂ ವಾಡೊಂಕ್ ಆನಿ ತಾಂಚಿಂ ದೆಣೆಂ ಆನಿ ಜಿಣಿ ಪವಿತ್ರ್ ಸಭೆಕ್

ಆನಿ ಸಮಾಜಾಕ್ ಫಾಯ್ದ್ಯಾಚಿ ಜಾವ್ನ್ ರೂಪಿತ್ ಕರುಂಕ್ ತಾಕಾ ತುಜೊ

ಆಧಾರ್ ದಿ ಮ್ಹಣ್ ಆಮಿ ನಮ್ರತಾಯೆನ್ ಮಾಗ್ತಾಂವ್. ಕ್ರಿಸ್ತಾ ,

ಆಮ್ಚ್ಯಾ ಸೊಮಿಯಾ ಮಾರಿಫತ್, ಆಮೆನ್.

4. ದೆವಾಚೆಂ ಉತರ್ :

ಮಾತೆವ್18:1-5

ಮಾತೆವ್ 19:13-15

ಮಾತೆವ್ 21:14-16

ಮಾರ್ಕ್ 10:13-16

ಲೂಕ್ 2:46-52

5. ನಿಯಾಳ್ :

ವೊಡ್ತಾಂತ್ಲ್ಯಾ ಫುಲಾಂ ಬರಿಂ ಭುರ್ಗಿಂ ಕುಟ್ಮಾಂತ್ ಸೊಭಾಯ್ ಆನಿ

ಸಂತೊಸ್ ದಿತಾತ್, ಭುರ್ಗ್ಯಾಂ ಥಂಯ್ ದಿಸೊನ್ ಯೆತಾ ಸರಳಾತಾ, ನಿಸ್ವಾರ್ಥ್ಪಣ್,

ಖಾಲ್ತೆಪಣ್ ಆನಿ ಬರೆಂ ಮನ್. ಶೆಗುಣಾಚಿಂ ಭುರ್ಗಿಂ ಆವಯ್ ಬಾಪಾಯ್ಚಿಂ

ದಿರ್ವಿಂ ಆನಿ ಗ್ರೇಸ್ ಕಾಯ್, ಬರಿಂ ಭುರ್ಗಿಂ ಸಮಾಜಾಚೊ ಭರ್ವಸೊ ಆನಿ

ಪವಿತ್ರ್ ಸಭೆಚೆಂ ಭವಿಶ್ಯ್.

ಜೆಜು ದೆವಾಚೊ ಪೂತ್ ಮನಿಸ್ ಜಾವ್ನ್ ಆಮ್ಚೆ ಮಧೆಂ ಜಿಯೆಲೊ.

ಬೆತ್ಲೆಹೆಮಾಚೆ ಖಾವ್ಣೆರ್ ಬಾಳೊಕ್ ಜಾವ್ನ್ ತೊ ಜಲ್ಮಲೊ. ನಜರೆತಾಂತ್ ಹೆರಾಂ

ಭುರ್ಗ್ಯಾಂ ಸಂಗಿಂ ತೊ ಲ್ಹಾನ್ ವ್ಹಡ್ ಜಾಲೊ. ತಾಚ್ಯೆ ಆವಯ್ ಬಾಪಾಯ್ಕ್

ತೊ ಖಾಲ್ ಜಾಲೊ. ಪ್ರಾಯೆನ್, ಜಾಣ್ವಾಯೆನ್ ಆನಿ ದೆವಾಚೆ ಕುರ್ಪೆನ್ ತೊ

ವಾಡ್ಲೊ. ಅಶೆಂ ದೆವಾಕ್ ಆನಿ ಮನ್ಶಾಕ್ ತೊ ಮಾನ್ವಲೊ.

ಭುರ್ಗೊ ಜೆಜು ಸರ್ವ್ ಭುರ್ಗ್ಯಾಂಕ್ ಆದರ್ಶ್. ಜರ್ ಭುರ್ಗ್ಯಾಂನಿ ಜೆಜು

ಪರಿ ತಾಂಚಾ ಆವಯ್ ಬಾಪಾಯ್ಕ್ ಖಾಲ್ ಜಾವ್ನ್, ಪ್ರಾಯೆನ್, ಜಾಣ್ವಾಯೆನ್

ಆನಿ ದೆವಾಚೆ ಕುರ್ಪೆನ್ ಲ್ಹಾನ್ ವ್ಹಡ್ ಜಾಲ್ಯಾರ್ ತಾಂಚೆಂ ಭವಿಶ್ಯ್ ಪ್ರಕಾಸ್‌ಭರಿತ್

ಜಾಂವ್ಚ್ಯಾಂತ್ ಕಸಲೊಚ್ ದುಬಾವ್ ನಾ.

ಜೆಜುನ್ ಭುರ್ಗ್ಯಾಂಚೊ ಮೋಗ್ ಕೆಲೊ. ಸರ್ಗಿಂಚಾ ರಾಜಾಂತ್ ಯೆಂವ್ಕ್

ಲ್ಹಾನಾ ಭುರ್ಗ್ಯಾಂಚೊ ಮನೋಭಾವ್ ಗರ್ಜೆಚೊ ಮ್ಹಣ್ ತಾಣೆಂ ಶಿಕಯ್ಲೆಂ.

ಭುರ್ಗ್ಯಾಂ ಥಂಯ್ ದಿಸೊನ್ ಯೆಂವ್ಚೆಂ ಖಾಲ್ತೆಪಣ್ ಸರ್ಗಿಂಚಾ ರಾಜಾ ಕುಶಿನ್

ಚಮ್ಕೊಂಕ್ ಆಧಾರ್, ರಾಗ್, ಹಂಕಾರ್, ಗರ್ವ್ ಆನಿ ಸ್ವಾರ್ಥ್ ಸರ್ಗಿಂಚಾ

ರಾಜಾಕ್ ಯೇಂವ್ಕ್ ಅಡ್ಕಳ್. ದೆಕುನ್ ಭುರ್ಗ್ಯಾಂ ಥಂಯ್ ಅಸಲೆ ಗೂಣ್

ರೂಪಿತ್ ಕರುಂಕ್ ಆವಯ್ ಬಾಪಾಯ್ನಿ ಮಿನತ್ ಘೆವ್ಚಿಂ.

ಭುರ್ಗಿಂ ಕುಟ್ಮಾಚೊ ಭರ್ವಸೊ ಅನಿ ಸಮಾಜೆಚೊ ಫುಡಾರ್, ಭುರ್ಗಾಂ

ಥಂಯ್ ದಾಕಯಲ್ಲೊ ಮೋಗ್ ಆನಿ ತಾಂಚೆ ಸಂಗಿಂ ಖರ್ಚಿಲ್ಲೊ ವೇಳ್

ನಿರ್ಪಳ್ ಜಾಯ್ನಾ. ದೆಕುನ್ ಆವಯ್ ಬಾಪಾಯ್ನಿ ತಾಂಚೊ ಮೊಲಾಧಿಕ್ ವೇಳ್

ಭುರ್ಗ್ಯಾಂ ಸಂಗಿಂ ಖರ್ಚುಂಕ್ ಪಾಟಿಂ ಕರ್ಚೆಂ ನ್ಹಯ್.

ಜೆಜುನ್ ಭುರ್ಗ್ಯಾಂಕ್ ಪೊಟ್ಲುನ್ ದರ್ಲೆ ಆನಿ ತಾಂಚೆರ್ ಆಪ್ಲೆಂ ಹಾತ್

ದವರುನ್ ತಾಂಕಾಂ ಆಶೀರ್ವಾದ್ ದಿಲೊ. ಜೆಜುಚೊ ಆಶೀರ್ವಾದ್ ಆಸಾ ತರ್

ಜೀವನ್ ಸಾರ್ಥಕ್. ಜೆಜು ವಿಣೆ ಜಿಣಿ ಅರ್ಥಾರಹಿತ್, ಜೆಜುಚಾ ಆಶೀರ್ವಾದಾನ್

ಅನಿ ಸ್ವಪ್ರೇತನಾನ್ ಭುರ್ಗ್ಯಾಂ ಥಂಯ್ ಆಸ್‌ಲ್ಲಿಂ ದೆಣಿಂ ಸಮಾಜಾಕ್ ಆನಿ

ಪವಿತ್ ಸಭೆಕ್ ಆದಾಯಾಚಿ ಕರ್ಚಿ ಜವಾಬ್ದಾರಿ ವ್ಹಡಿಲಾಂಚಿ, ದೆಕುನ್ ಆಮ್ಚ್ಯಾ

ಭುರ್ಗ್ಯಾಂಕ್ ಆಮಿ ಜೆಜು ಸರ್ಶಿನ್ ವರ್ಯಾಂ.

ಆಮಿ ಸರ್ವ್ ದೆವಾಚಿಂ ಭುರ್ಗಿಂ, ಪವಿತ್ರ ಸ್ನಾನಾ ವರ್ವಿಂ ಆಮಿ ದೆವಾಕ್

ಬಾಪಾ ಮ್ಹಣ್ ಉಲೊ ಕರ್ಚೆ ಭಾಗ್ ಜೊಡ್ತಾಂವ್ ಆನಿ ತಾಚಾ ಪುತಾಚಿಂ

ಭಾವ್ ಭಯ್ಣ್ ಜಾತಾಂವ್. ದೇವ್ ಆಮ್ಕಾಂ ತಾಚಾ ಭುರ್ಗ್ಯಾಂಕ್ ಖಂಡಿತ್

ವಿಸರ್ನಾ, ತಶೆಂಚ್ ಆಮಿ ದೆವಾಕ್ ವಿಸರ್ಚೆಂ ನ್ಹಯ್. ಆಮ್ಚ್ಯಾ ಸಂತೊಸಾಂತ್ ತಾಕಾ ಆಮಿ ಅರ್ಗಾಂ ದಿವ್ಯಾಂ ಅನಿ ಆಮ್ಚ್ಯಾ ಕಶ್ಯಾಂತ್ ತಾಚೊ ಆಧಾರ್ ಮಾಗೊಂಕ್ ಶಿಕ್ಯಾಂ.

6. ಪ್ರಾರ್ಥನಾಂ:

ಪ್ರೇರಕ್: ಮೊಗಾಳ್ ಭಾವಾಭಯ್ಣಿಂನೊ, ಭುರ್ಗ್ಯಾ ಸಾರ್ಕೆಂ ಪಾತ್ಯೆಣೆನ್ ಆಮ್ಚ್ಯಾ

ಸರ್ಗಿಂಚಾ ಬಾಪಾ ಲಾಗಿಂ ಜೆಜು ಮುಕಾಂತ್ರ್ ಆಮ್ಚಿ ಪ್ರಾರ್ಥನಾಂ

ಉಬಾರ್ಯಾಂ.

ಮೊಗಾಳಾ ಬಾಪಾ, ಪವಿತ್ ಸಭೆಚಾ ವ್ಹಡಿಲಾಂನಿ ಜೆಜುನ್ ಭುರ್ಗ್ಯಾಂಚೊ

ಮೋಗ್ ಕೆಲ್ಲ್ಯಾ ಪರಿಂ ಭುರ್ಗ್ಯಾಂಚೊ ಮೋಗ್ ಕರುಂಕ್ ಆನಿ ತಾಂಣಿಂ

ಶೆಗುಣಾಂಚಿ ಜಿಣಿ ಜಿಯೆಂವ್ಕ್ ತಾಂಕಾಂ ಪ್ರೇರಣ್ ದೀಶೆಂ ತುಜೆ ಲಾಗಿಂ

ಮಾಗ್ತಾಂವ್.